Challandes: Ëndrra e Kosovës për Evropian do të bëhet realitet

Sonte do të zhvillohet ndeshja më e rëndësishme e Dardanëve deri më tani

Përzgjedhësi i Kosovës, Bernard Challandes, beson se ëndrra e Kosovës për t’u kualifikuar në Evropian do të bëhet realitet, përtej situatave të vështira që janë krijuar për shkak të COVID-19.

Në prag të përballjes me Maqedoninë e Veriut, në gjysmëfinalen e play off-it të Ligës së Kombeve, trajneri zviceran beson se ëndrra do të bëhet realitet, shkruan albinfo.ch.

“Jemi pranë një momenti kur mund të prekim ëndrrën, por kemi disa probleme, nuk jemi në situatën më perfekte. Gjithsesi, Kosova, si ekip, futbolli ka treguar se di t’i përballojë këto situata, duke i kthyer në favor”, shprehet Challandes.

Ai është mjaft optimist: “Si trajner, nëse je pesimist dhe gjithmonë i sheh vetëm pjesët e vështira, atëherë duhet të ndërrosh punën. E kam të qartë me çka përballem, e shoh se kemi mundësi, shoh se mund të arrijmë diçka si ekip, koha ka ardhur, nuk mund të presim më shumë për të realizuar atë që duam”.

Trajneri zviceran foli edhe për mungesën e tifozëve. “Dua të luaj me tifozë. Për mua tifozët janë pjesa më e rëndësishme e futbollit. Por, duhet ta pranojmë këtë situatë dhe është e qartë se unë i dua të gjithë futbollistët e mi, por kjo është situata, duhet ta pranojmë”.

Ndeshja Maqedoni e Veriut-Kosovë zhvillohet të enjten në orën 20:45. Skuadra që fiton, do të kualifikohet në finale të ‘play-off’-it dhe në nëntor do të luajë me fituesin e ndeshjes Gjeorgji-Bjellorusi.

---