3 kantone zvicerane me kufizime të reja

Përballë një rritje të konsiderueshme të rasteve të Covid-19 dhe shtrimeve në spital, kantonet zvicerane të Jura, Fribourg dhe Neuchâtel po zbatojnë kufizime të reja duke filluar nga 23 tetori

Në një njoftim për shtyp, autoritetet kantonale njoftuan se Jura është tani “ndër rajonet më kritike” në Evropë.

Që nga mëngjesi i së premtes 50 pacientë me koronavirus janë të shtruar në spital në kanton, nga 11 që ishin një javë më parë.

Takimet, mbledhjet ose demonstratat e më shumë se 15 personave, përfshirë fëmijët, tani do të ndalohen. Restorantet, kafenetë dhe baret duhet të mbyllen në orën 22:00, shkruajnë mediat zvicerane, përcjell albinfo.ch.

Në këto institucione, maksimumi katër persona mund të ulen në të njëjtën tryezë, me përjashtim të njerëzve që jetojnë në të njëjtën shtëpi. Baret dhe klubet e natës duhet të qëndrojnë të mbyllura.

Sportet ekipore dhe ato të kontaktit janë të ndaluara me përjashtim të trajnimit individual. Qendrat e fitnesit duhet të qëndrojnë të mbyllura. Kampet e skive, kampet sportive dhe udhëtimet studimore janë pezulluar.

Mbajtja e maskës është e detyrueshme në çdo kohë në vendin e punës, si në ndërmarrjet publike ashtu edhe në ato private. Është gjithashtu e detyrueshme për nxënësit në perimetrin e shkollave të mesme kur nuk janë ulur në klasë, përcjell tutje albinfo.ch.

Në Fribourg, mbledhjet e më shumë se 10 njerëzve në hapësira publike dhe private do të ndalohen, tha Këshilli i Shtetit në një deklaratë të premten. Ky ndalim vlen veçanërisht për ngjarje të tilla si demonstrata politike, kulturore dhe civile.

Klubet e natës, kazino, dhomat e lojërave, bilardo, bowling dhe ambiente të tjera argëtimi do të mbyllen. Të gjitha institucionet e tjera duhet të mbyllen në orën 11:00 dhe mund të strehojnë vetëm grupe me katër persona për tryezë, përveç nëse klientët jetojnë në të njëjtën familje.

Neuchâtel ngriti nivelin e gatishmërisë në të kuqe të premten, që do të thotë se shpërthimet e Covid-19 po përhapen me një shpejtësi alarmante.

Takimet e më shumë se 10 personave janë të ndaluara në hapësirat publike dhe private, me përjashtim të funeraleve.

---