Ekspertët e OBSH-së, në Kinë

Shkencëtarë të Organizatës Botërore të Shëndetësisë do të vizitojnë Kinën të enjten për të hetuar origjinën e koronavirusit

Pas refuzimit të autoriteteve kineze, në lidhje me ardhjen e ekspertëve në Kinë, tani është bërë e ditur se dhjetë shkencëtarë të Organizatës Botërore të Shëndetësisë do të vizitojnë Kinën të enjten për të hetuar origjinën e koronavirusit, kanë thënë autoritetet të hënën, pas më shumë se një viti prej kur ka nisur pandemia, dhe në mesin e akuzave se Pekini ka tentuar të pengojë hetimet, transmeton albinfo.ch.

Thuhet se misioni i shumëpritur përbën rëndësi të madhe politike, në kohën kur pandemia e koronavirusit ka shkatërruar botën, ka shkaktuar gati 2 milionë vdekje dhe ka dëmtuar rëndë ekonominë.

Organizata Botërore e Shëndetësisë “do të kryejë hetim të përbashkët për origjinën e koronavirusit, bashkë me shkencëtarët kinezë”, ka thënë Komisioni Kombëtar i Shëndetësisë, përmes një deklarate, pa dhënë detaje shtesë.

Shtyrja e misionit në minutën e fundit më herët gjatë këtij muaji, është pritur me kritika të mëdha nga udhëheqësi i OBSH-së, Tedros Adhanom Ghebreyesus.

Ai ka thënë se ka qenë “shumë i zhgënjyer” që Kina nuk ka autorizuar hyrjen e ekipit – sidomos pasi dy anëtarë veçse janë nisur.

Ekspertët e OBSH-së do të duhet t’i nënshtrohen masës së karantinës për dy javë pas hyrjes në Kinë.

Më pas ata pritet të vizitojnë Vuhanin – qytetin ku është identifikuar për herë të parë virusi më 2019. /Albinfo.ch

 

---