Më 7 mars votohet në Vaud: Rast për shqiptarët të zgjedhin të preferuarit e tyre

Mbetet shumë për t’u bërë që të ngrihet më lart vetëdijesimi i shqiptarëve për të votuar, kur dihet se të drejtë vote kanë dhe të huajt me leje qëndrimi të përhershëm (C)

Në zgjedhjet për asambletë komunale në kantonin Vaud, që mbahen më 7 mars 2021, garojnë nëpër parti të ndryshme politike zvicerane me dhjetëra kandidatë shqiptarë. Ky numër tregon rritje në krahasim me zgjedhjet e kaluara.

Për komunitetin e huaj këto zgjedhje në nivel komunal kanë po ashtu një rëndësi të madhe, ngase i jepet mundësi çdo qytetari që jeton më shumë se 10 vjet në Zvicër dhe 3 vjet në kantonin Vaud të votojë për çështje që kanë të bëjnë me menaxhimin e qytetit, shkruan Albinfo.ch.

Kushtetuta e kantonit Vaud mundëson që krahas konfrontimit të ideve mes partive politike për programet e tyre, të merret parasysh edhe bindja e qytetarëve të huaj që të dalin ta ushtrojnë këtë të drejtë të votës që është një sfidë e këtyre zgjedhjeve.

Vendin e këshilltarit nëpër komunat e këtij kantoni para katër vjetëve e kishin fituar 15 politikanë shqiptarë, përfshirë edhe kryeqytetin, Lozanën, ku për herë të parë është zgjedhur politikani Musa Kamenica, i cili garon edhe në këto zgjedhje.

Sipas këtij rezultati, numri i këshilltarëve me kombësi shqiptare në komunat e kantonit Vaud mund të thuhet se është në rritje në krahasim me zgjedhjet e kaluara.

Megjithatë, edhe në këto zgjedhje mbetet shumë për t’u bërë që të ngrihet më lart vetëdijesimi i shqiptarëve për të votuar, kur dihet se të drejtë vote kanë dhe të huajt me leje qëndrimi të përhershëm (C).

Për elektoratin e heshtur shqiptar dhe mundësinë e sensibilizimit të tij për të votuar, kanë folur disa nga kandidatët shqiptarë në një debat virtual të organizuar nga platforma albinfo.ch.

Në zgjedhjet e vitit 2016 participimi i të huajve në kantonin Vaud ka qenë 25.6%, pak më i lartë se ne vitin 2011,  kur ishte regjistruar 23 për qind. Numri më i lartë i pjesëmarrjes ka qenë ne vitin 2006, me 26.9%,  ku ishte edhe hera e parë që të huajt kishin drejtë vote në nivelin komunal.

Pikërisht për senzibilizimin e të huajve për të votuar në zgjedhjet e sivjetme komunale kishte lansuar një fushatë  edhe qyteti i Llozanës.

Në Lausanne pjesëmarrja e të huajve në zgjedhjet e fundit lokale ishte 19.5%. Edhe në këto zgjedhje shqiptarët nuk garojnë vetëm me Partinë Socilademokrate, por edhe në partitë e djathta ose të qendrës.

---