Siguria e Zuckerberg-ut ka kushtuar 23 milionë dollarë

Një paraqitje e re në Komisionin e Letrave me Vlerë ka nxjerrë se gjatë vitit të kaluar platforma Facebook ka shpenzuar më shumë se 23 milionë dollarë për sigurinë e shefit të saj ekzekutiv, Mark Zuckerberg.

The Verge, faqe kushtuar të rejave teknologjike, tregon se kjo lëvizje e kompanisë ka ardhur si pasojë e identifikimit nga ana e  Facebook-ut e “kërcënimeve specifike ndaj Zuckerberg-ut”.

Kompania ka thënë nëpërmjet një deklarate se “ai është sinonim i Facebook-ut dhe si rezultat, ndjenja negative në lidhje me kompaninë tonë është e lidhur drejtpërdrejt me Zuckerberg-un dhe shpesh transferohet te ai”.

Në bazë të rishikimit vjetor të ndërmarrjes së programeve që lidhen me sigurinë, dallohet se rritja e kostove të mbrojtjes së Zuckerberg-ut dhe familjes së tij, kryesisht është për shkak të protokolleve të udhëtimit gjatë pandemisë, gjithashtu edhe për shkak të rritjes së mbulimit të sigurisë gjatë zgjedhjeve presidenciale të SHBA-së.

Këtu nuk anashkalohen as kostot në rritje të personelit të sigurisë.

Në deklaratën e bërë për çështjen, përfaqësuesi i Facebook-ut ka thënë se “këto kosto janë të përshtatshme dhe të domosdoshme nën panoramën kërcënuese dhe fakti që Zuckerberg-u ka kërkuar të marrë vetëm një dollar pagë vjetore dhe nuk merr ndonjë pagesë shtesë, shpërblime apo kompensim tjetër stimulues”.

Në mbledhjen e aksionerëve të kompanisë, Facebook-u ka deklaruar se do të paraqesë një propozim për të ofruar siguri personale për drejtuesit jopunonjës herë pas here. Kjo për shkak të kontrollit të vazhdueshëm me të cilin përballen ata për shkak të shërbimit të tyre në bordin drejtues.

Në muajt janar dhe shkurt, Facebook-u ka miratuar shërbimet e sigurisë personale për disa nga drejtuesit jopunonjës për shkak të nivelit të lartë të vëzhgimit me të cilin ata përballen “pas zgjedhjeve të SHBA-së në vitin 2020 dhe pas sulmit në ndërtesën e Capitol-it në gjashtë janar 2020”.