Abdixhiku e konsideron Qeverinë Kurti më dembelen në Evropë

Foto nga Lumir Abdixhiku në Facebook

Qeverin Kurti, kreu i Lidhjes Demokratike të Kosovës, Lumir Abdixhiku, e ka quajtur si qeveria më dembele në Evropë, për shkak se gjatë vikendit ka mbyllur qendrat e vaksinimit. Përmes Facebookut, Abdixhiku ka kritikuar procesin e vaksinimit, duke thënë se qendrat janë të pamjaftueshme, edhe sikur të hapeshin në tërësi.

“As tre turne s’bëjnë punë në kulm të shpërthimit masiv. Në vend të një administrimi kolektiv, gjithënacional, që përfundon në pak ditë, Qeveria jonë zgjedh pushim. Mbesim të fundit në Evropë në administrim; të parët për infektime për kokë banori në ditë. Një vend kaq i vogël, vazhdon t’i ketë 80% e popullsisë të pavaksinuar”, ka shkruar Abdixhiku.

Deputeti i LDK-së ka thënë se mbyllja e sërishme vjen si e pashmangshme, derisa për Qeverinë Kurti thotë se kanë dezertuar kujdesin për pandeminë.

“Mbyllja e sërishme na vjen si e pashmangshme. Këta kanë dezertuar kujdesin për pandeminë. S’merren me të, sikurse me asgjë. Prandaj kujdesuni për vete! Vaksinohuni! – kurdo që vendosin këta të punojnë”, ka shtuar ai.