Vitia: Doza e tretë e vaksinës, do të jetë e nevojshme

Edhe doza e tretë e vaksinës do të jetë e nevojshme në shtetin e Kosovës. Ministri i Shëndetësisë, Arben Vitia, ka thënë se situata me Covid-19 është e rëndë, pavarësisht rënies së rasteve, transmeton albinfo.ch.

Në konferencën për medie, pas mbledhjes së qeverisë, Vitia ka thënë se kanë hartuar planin për ngritjen e kapaciteteve për spitalet fushore.

“Bazuar në ditët e fundit besojmë se kjo nuk do të jetë e nevojshme. Ne kemi përfunduar edhe rekrutimin e personelit shëndetësor”, ka thënë ai.

Krahas kësaj, ministri i Shëndetësisë bëri thirrje për vaksinim.

“Në stoqet tona kemi mbi 600 mijë vaksinave të sigurta, prandaj qytetarët duhet të vaksinohen”, tha ai.

E në bazë të analizave të IKShPK-së, Vitia ka thënë se do të jetë e nevojshme vaksina e tretë për çka kanë filluar edhe negocimin për blerjen e 1 milion vaksinave të tjera.