Kosovë: Mbi 1900 pako me vota nga diaspora kanë arritur në KQZ

Votimi përmes postës ka nisur më 15 shtator, ndërkaq përfundon më 15 tetor.

Komisioni Qendror i Zgjedhjeve në Kosovë ka njoftuar se deri më tani ka pranuar mbi 1900 pako me fletëvotime nga diaspora për zgjedhjet e 17 tetorit.

“Deri më datën 1 tetor, Komisioni Qendror i Zgjedhjeve ka pranuar gjithsejtë 1932 pako me fletëvotime, të cilat janë tërhequr nën përcjelljen e Policisë së Kosovës nga zyra postare, numër 6, në Prishtinë. Pra, gjitha këto pako janë të ruajtura në hapësirën, e cila shfrytëzohet nga Komisioni Qendror i Zgjedhjeve, në Ministrinë e Infrastrukturës. Pakot me fletëvotime janë duke u ruajtur nga Policia e Kosovës përgjatë 24 orëve dhe hapësirat e brendshme janë të mbuluar me kamera”, ka thënë Burim Ahmetaj, Shef i Sekretariatit të KQZ-së, Burim Ahmetaj, transmeton Albinfo.ch.

 

---