Për katër vjet, janë larguar mbi 400 mjekë nga Kosova

Foto ilustrim: Luis Melendez

Kushtet jo të mira të punës dhe pagat e ulëta, kanë bërë që kuadri specialistik mjekësor të ikë nga Kosova në vende të ndryshme të botës. Vetëm për katër vjet nga Kosova kanë ikur mbi 400 mjekë.

Me kushtet e punës, politikat shëndetësore dhe me pagesë, nuk janë pajtuar shumë mjekë specialistë, andaj kjo ka qenë edhe arsyeja e ikjes nga Kosova për të kërkuar punë në vende të ndryshme të Evropës e më gjerë.

Kryetari i Odës së Mjekëve të Kosovës, dr. Pleurat Sejdiu, konfirmoi se largimi i mjekëve po ndodh për shkak të kushteve të punës.

“Gjatë një minisondazhi që e bëjmë me rastin e aplikimit për dokumentin e nevojshëm për punësim në shtetet e BE-së, por jo vetëm, shumica janë deklaruar se largohen për shkak të kushteve të punës, pastaj vijnë kualiteti i shkollimit specialistik dhe rrogat”, thotë ai.

Po ashtu Sejdiu tregon që mosha e atyre mjekëve, të cilët vendosin që veprimtarinë e tyre ta zhvillojnë në ndonjë vend tjetër, është kryesisht mosha e mesme, rreth 31-vjeçare.

Po ashtu dr. Pleurati thotë që nuk kanë qëndruar duarkryq, përballë këtij trendi të ikjes së mjekëve nga Kosova, ai pohon që në Ministrinë e Shëndetësisë kanë shkuar me propozime konkrete për gjetjen e zgjidhjes së këtij problemi, por nuk kanë hasur në bashkëpunim nga këta të fundit.

“Ne në disa raste i kem bërë MSH-së propozime konkrete për rregullimin e kësaj çështjeje, si përmirësimi i kushteve të punës, mënyra e ngritjes së cilësisë të shkollimit specialistik, ngritja e pagave si dhe precizimi ligjor për punësimin e afër 300 mjekëve të papunë, por shihet që nuk kemi hasur nga MSH-ja në mirëkuptim apo bashkëpunim rreth kësaj çështjeje”, përfundon ai.

Ndryshe, sipas të dhënave të publikuara në tetor nga Agjencia e Statistikave të Kosovës (ASK), thuhet se më 2020 numri i përgjithshëm i të punësuarve në sistemin shëndetësor ishte 13,518. Prej tyre, 3,555 ishin mjekë specialistë, kurse 8,386 infermierë dhe 1,577 staf jomjekësor. Paga bruto e mjekëve specialistë është rreth 600 euro në muaj, derisa infermieri për punën që kryen paguhet rreth 300 euro në muaj.