Shënohet rekord i rasteve në Gjermani

(KEYSTONE/Laurent Gillieron)

Gjermania raportoi 80.430 raste të reja me Covid-19 të mërkurën, që është shifra më e lartë ditore që nga fillimi i pandemisë, transmeton albinfo.ch.

Theksohet se rekordi i mëparshëm i rasteve ditore ishte shënuar më 26 nëntor, kur ishin regjistruar mbi 76.000 të infektuar për 24 orë, shkruan Reuters. Përveç infeksioneve, të mërkurën u raportuan edhe 384 të vdekur dhe shifra e përgjithshme e viktimave shkoi në 114.735. Ndërkohë numri i të infektuarve ka shkuar në mbi 7 milionë e 661 mijë.

Pak më pak se 75 për qind e popullsisë e ka marrë të paktën një dozë të vaksinës, sipas të dhënave të Institutit “Robert Koch”.

Shkalla mesatare e infeksioneve për shtatë ditë ka shënuar rritje vazhdimisht që nga fillimi i vitit. Të mërkurën shkoi në 407.5 raste për 100.000 banorë, nga 387.9 për 100.000 banorë një ditë më parë.

Kjo shkallë zakonisht i përcakton edhe politikat për luftimin e pandemisë, prandaj ka gjasë që qeveria ta shqyrtojë vendosjen e masave të reja ditët e ardhshme.