Përfaqësuesit e Unionit të Bizneseve Shqiptare-Gjermane u pritën nga Kryeministri i Kosovës

Përfaqësuesit e Unionit të Bizneseve Shqiptare-Gjermane, në përbërje nga kryetari Nazmi Viqa, nënkryetari Zenun Krasniqi, drejtori i financave, Vllazmin Kelmendi, sekretari Nexhmedin Veliqi, anëtari i kryesisë, Bekim Borovci dhe Faton Blakqori u pritën nga Kryeministri i Republikës së Kosovës, Albin Kurti, bashkë me zëvendësministren e Punëve të Jashtme dhe Diasporës, Liza Gashi, përcjell albinfo.ch.

Kryeministri Kurti i falënderoi për angazhimin dhe kontributin që kanë dhënë si platformë ekonomike në mërgatë. Ai foli për mundësitë që Kosova ofron për investime dhe i njoftoi për themelimin e Gjykatës Komerciale që pritet të funksionalizohet brenda dy muajve të ardhshëm, e që beson se do të rrisë sigurinë juridike për bizneset vendore dhe investimet e huaja.

Duke u shprehur interesimin për të krijuar një partneritet të ngushtë me mërgatën, kryeministri tha se mirëpret të gjithë ndërmarrësit nga mërgata që bashkë edhe me partnerët e tyre ndërkombëtarë të investojnë në Kosovë, me prioritet në prodhim të produkteve.

Fokusi i bisedës nga përfaqësuesit e Unionit ishte kërkesa që anëtarëve, respektivisht afaristëve të Unionit t’u mundësohët qasja në projektet ekonomike në Kosovë, si prodhimi i energjisë solare dhe të erës. Qasje e cila do të realizohej përmes një fondi investues të përbashkët të themeluar dhe menagjuar nga Unioni.

Ndër të tjera, në takim u diskutua edhe për brengat dhe sfidat që kanë bizneset, anëtare të Unionit në Kosovë dhe trendet aktuale të ekonomisë kosovare.