Kosova garon me 4 klube në ligat evropiane të futbollit

Kampioni i Kosovës nga ky edicion nuk do të garoj në rundin para kualifikues, por direkt në rundin e parë kualifikues të Ligës së Kampionëve

Kosova do të përfaqësohet me 4 klube që do ta përfaqësojnë futbollin në garat evropiane. Ky është edhe lajmi i mirë që konfirmohet për futbollin. Ai u publikua nga kreu i FFK-së, Agim Ademi, njofton Albinfo.ch.

“Siç u pa edhe në ranglistën e fundit të UEFA-s, për renditjen e ligave kombëtare, liga e Kosovës ka shënuar përparimin e radhës. Dhe, në bazë të këtij përparimi, konfirmohet lajmi që FFK-ja e ka dhënë edhe para fillimit të edicionit, se nga ky edicion liga jonë do të përfaqësohet me 4 klube. 3 nga kampionati dhe fituesi i kupës. Mirëpo, risia tjetër është se si rezultat i ngritjes së rangimit të ligës, kampioni i Kosovës nga ky edicion nuk do të garojë në rundin para kualifikues, por direkt në rundin e parë kualifikues të Ligës së Kampionëve”, tha Agimi.

Përparimi i Ligës, përfaqësimi me më shumë klube në garat evropiane dhe rritja e cilësisë në kuadër të garimit tê brendshëm, është një tjetër dëshmi se futbolli i Kosovës po shënon rritje në çdo aspekt, që është edhe mision kryesor i Federatës së Futbollit të Kosovës.

---