Besimtarët myslimanë po festojnë sot Fitër-Bajramin

Fitër Bajramit – pa masa kufizuese dhe në atmosferë sikurse më parë

Pas 30 ditë agjërimi, myslimanët në mbarë botën sot festojnë Fitër Bajramin.

Qytetarë të shumtë janë parë mëngjesin e së hënës në Xhaminë e Madhe në Prishtinë, dhe asaj në Tiranë, për të falur namazin e Fitër Bajramit, ceremonia qendrore e së cilës u drejtua nga Myftiu i Kosovës, Naim Tërnava, përcjell albinfo.ch.

Namazi i Fitër Bajramit është falur në orën 06:09 të mëngjesit.

Tërnava në mesazhin e Fitër Bajramit një ditë më parë u shpreh se festa e Fitër Bajramit është festë që troket te te gjitha shtresat e popullatës me porosi e mesazhe të ngrohta gjithnjë në funksion të afrimit me rahmetin e krijuesit të gjithësisë, i cili për agjërimin ka premtuar shpërblim të veçantë.

Myftiu shtoi se pas dy vjetëve të shkuara që i kaluam në përballje me pandeminë Covid-19, kësaj radhe, falë Zotit të Madhëruar, Ramazanin që po e përmbyllim dhe festën e Fitër-Bajramit, ku e shijuam pa masa kufizuese, rikthyem atmosferën e Ramazanit në shtëpitë tona, bëmë namaze e ibadete nëpër xhamitë tona anekënd vendit, vizituam njëri-tjetrin, me një fjalë, shijuam mirësitë e Ramazanit ashtu siç e meriton ky muaj i bekuar.

“Dashtë Zoti që të mos përballemi më me masa kufizuese, të cilat qenë të domosdoshme, por krijuan një lloj distance ndërmjet nesh”, tha Tërnava.

Tërnava shtoi se në prag të festës së Bajramit lutemi e angazhohemi që në botë të mbretërojë paqja, mirëkuptimi, harmonia e solidariteti.

---