Britania raporton 78 raste të Lisë së majmunit

Shtatë raste të tjera të lisë së majmunëve janë identifikuar në Angli, raportuan sot zyrtarët shëndetësorë.

Agjencia e Sigurisë Shëndetësore në Britaninë e Madhe (UKHSA) tha se numri i rasteve të reja që nga 7 maji ka arritur në 78.

Ndër këto raste, 77 janë identifikuar në Angli dhe një rast është raportuar në Skoci. Që nga 24 maji, asnjë rast nuk ishte identifikuar në Uells ose Irlandën e Veriut, transmeton Dpa, përcjell Albinfo.ch.

Pavarësisht rritjes së rasteve, UKHSA tha se rreziku i përhapjes së infeksionit në Britaninë e Madhe mbetet i ulët.

Organi shëndetësor tha se një përqindje e dukshme e rasteve të identifikuara kanë qenë në mesin e personave që janë homoseksualë, biseksualë dhe meshkujve që kryejnë marrëdhënie seksuale me meshkuj të tjerë.

Këtyre personave në veçanti u është kërkuar që të jenë të vetëdijshëm për simptomat, veçanërisht nëse së fundmi kanë pasur një partner të ri seksual.

---