Fehr, megjithatë, nuk do të vizitojë Alba Festivalin

"Vizita ime ndërkohë është bërë një çështje politike”. Dhe ajo e di që organizatorët janë të shqetësuar për inskenimin e mundshëm politik të ngjarjes

Pas polemikës rreth anulimit të Festivalit Alba vitin e kaluar, këshilltarja (ministrja) e Qeverisë së Kantonit të Cyrihut, Jacqueline Fehr, në fakt kishte thënë se planifikonte të merrte pjesë në festival këtë vit. Tani ajo, pas akuzave për racizëm, ka ndryshuar mendje, transmeton albinfo.ch.

“Festivali Alba në Cyrih nuk duhet të errësohet nga tonet politike”, tha Jacqueline Fehr, prandaj po përmbahet nga vizita e saj e paralajmëruar në eventin madhor këtë fundjavë, ka shkruar ajo në Twitter të premten.

Vetëm pak ditë më parë, zëdhënësi i saj kishte bërë të ditur se Fehr “do të donte” të merrte pjesë në atë që organizatorët thonë se është festivali më i madh shqiptar në Evropë këtë vit, shkruan sda.ch. Fehr ka shkruar në Twitter se ishte ftuar sërish nga organizatori gjatë një telefonate të enjten. “Por vizita ime ndërkohë është bërë një çështje politike”, shpjegon ajo vendimin e saj. Dhe ajo e di që organizatorët janë të shqetësuar për inskenimin e mundshëm politik të ngjarjes.

Planifikohet takimi me organizatorin

Prandaj, Fehr dëshiron të takohet me organizatorët,  javën e ardhshme jashtë festivalit. “Kjo për faktin se organizatorët dhe unë kemi të njëjtin interes: festivali duhet të jetë argëtues dhe t’i bashkojë njerëzit me muzikë të mrekullueshme dhe një atmosferë të mirë”, ka shkruar ajo në Twitter, duke uruar të gjithë për festën.

Siç dihet tashmë, këshillitarja qeveritare e kishte ndaluar mbajtjen e festivalit “në momenztin e fundit”, vitin e kaluar. Për shkak të përhapjes së shpejtë të virusit korona, ajo pati anuluar lejen më pak se 48 orë para fillimit të festivalit, përcjell albinfo.ch. Kjo edhe për arsye se, sipas qëndrimit të atëhershëm, shkalla e vaksinimit në komunitetin shqiptar është e ulët.

Prandaj Komisioni Federal Kundër Racizmit ka kritikuar znj. Fehr, siç u bë e njohur këtë javë. Sipas komisionit, vendimi i saj ishte diskriminues. Fehr është shprehur pastaj se ajo i ka marrë “shumë seriozisht kritikat”. Si dhe kishte shtuar se marrëdhëniet e saj me komunitetin shqiptar janë të mira.

---