Betohet Bajram Begaj, Presidenti i ri i Shqipërisë

Pas Alfred Moisiut, ai është kreu i dytë i shtetit që vjen nga Forcat e Armatosura

Bajram Begaj ka dhënë betimin sot në Kuvendin e Shqipërisë si presidenti i tetë me radhë i Shqipërisë. Begaj bëri betimin me dorë mbi Kushtetutë, e detyrën e nisi pas këtij procesi.

Më pas ai do të drejtohet drejt Presidencës, ku do të mbahet ceremonia e dorëzim-pranimit të detyrës nga presidenti i deritanishëm Ilir Meta te presidenti i ri Bajram Begaj.

“Ta zëvendësojmë politikën e konfliktit me atë të dialogut dhe të ndërtojmë ura bashkëpunuese e lidhëse. Nevojitet unitet për të siguruar vitalitetin e Shqipërisë, të gjithë së bashku ta bëjmë Shqipërinë edhe më të bukur. Zoti i bekoftë shqiptarët dhe Shqipërinë”, tha ndër tjera Begaj.

Pas Alfred Moisiut, ai është kreu i dytë i shtetit që vjen nga Forcat e Armatosura, përcjell albinfo.ch.

Emri i tij për të qenë presidenti i tetë me radhë i shtetit erdhi me bekimin e kryeministrit shqiptar, Edi Rama, i cili zgjodhi përsëri modelin e ushtarakut, duke iu referuar Alfred Moisut, që ai e cilësoi një sukses.

Bajram Begaj (55), ka përfunduar studimet pranë Universitetit të Tiranës, Fakulteti i Mjekësisë, Dega Mjekësi e Përgjithshme dhe është titulluar oficer aktiv në specialitetin “Mjekësi” në vitin 1998.

Në këtë ceremoni po merr pjesë edhe presidentja e Kosovës, Vjosa Osmani.

---