Zvicra dhe SHBA planifikojnë bisedime vjetore

(KEYSTONE/Peter Klaunzer)

Zvicra dhe Shtetet e Bashkuara duan të vazhdojnë partneritetin e tyre strategjik në formën e një dialogu vjetor, sipas memorandumit të mirëkuptimit të nënshkruar për këtë qëllim në Uashington të premten, transmeton albinfo.ch.

Kjo deklaratë e qëllimit përfaqëson “një moment historik të rëndësishëm” me një nga partnerët kryesorë të Zvicrës në shumë fusha, sipas Sekretares së Shtetit zviceran, Livia Leu. Ajo u takua të premten me Zëvendës Sekretaren e Shtetit të SHBA-së, Wendy R. Sherman.

“Ne i vlerësojmë partnerët tanë zviceranë dhe do të vazhdojmë të punojmë së bashku ngushtë për të çuar përpara interesat e përbashkëta dypalëshe dhe për çështjet globale”, shkroi Sherman në Twitter.

Gjatë takimit të parë të këtij lloji, të mbajtur tetorin e kaluar në Bernë, të dy vendet u angazhuan për të nxitur bashkëpunimin e përbashkët në forumet ndërkombëtare, krahas forcimit të marrëdhënieve dypalëshe. Të premten, të dy delegacionet diskutuan gjithashtu mandatin e fuqisë mbrojtëse të Zvicrës për Shtetet e Bashkuara në Iran.

Të dy diplomatët diskutuan situatën gjeopolitike, luftën në Ukrainë, si dhe marrëdhëniet dypalëshe midis dy vendeve, sipas Ministrisë së Jashtme të Zvicrës, transmeton tutje albinfo.ch.