Qeveria zvicerane dëshiron të reduktojë rritjen e buxhetit të ushtrisë

(KEYSTONE/Christian Beutler)

Qeveria ka zbuluar idetë e saj të kursimeve për buxhetin e vitit 2024, duke përfshirë një rritje më të vogël se sa ishte planifikuar në shpenzimet ushtarake.

Planet para-buxhetore të shpallura të mërkurën vijnë si përgjigje ndaj rreth 2 miliardë CHF në shpenzime të reja të vendosura nga Parlamenti, dhe për të cilat qeveria është e shqetësuar se mund të krijojnë një deficit në arkat e shtetit, përcjell albinfo.ch.

Një planifikim i tillë i shpenzimeve, i vendosur verën e kaluar nga parlamentarët, ishte një rritje progresive në shpenzimet vjetore ushtarake, nga 5.6 miliardë CHF, në 7 miliardë CHF deri në vitin 2030.

Pas pushtimit rus të Ukrainës, ky vendim synonte të rriste gradualisht buxhetin e ushtrisë për të arritur të paktën 1% të prodhimit të brendshëm bruto zviceran.

Qeveria tani dëshiron të shkurtojë zgjerimin e planifikuar me 300 milionë CHF në 2024, 500 milionë CHF në 2025 dhe deri në 800 milionë CHF në 2026. Për ministrat, kjo ende paraqet një rritje prej rreth 3% në vit krahasuar me shpenzimet aktuale.

Politikani i Partisë Popullore, Werner Salzmann, tha të enjten se vendimi i qeverisë ndoqi “rrugën e rezistencës më të vogël dhe nuk mori parasysh në asnjë mënyrë vendimin e Parlamentit”.

Salzmann, i cili mbikëqyr Komisionin e politikave të sigurisë në Senat, tha se vendimi do të vononte planet e modernizimit të ushtrisë dhe se planet e saj të prokurimit për vitet e ardhshme do të duhej të rivlerësoheshin të gjitha. Ai tha se qeveria duhet të bëjë shkurtime diku tjetër, përcjell tutje albinfo.ch.