Ministri i Jashtëm austriak flet për Asociacionin, jep shembullin e Tirolit Jugor

Alexander Schallenberg ka thënë se normalizimi i marrëdhënieve mes Kosovës dhe Serbisë është i rëndësishëm për rajonin

Ministri i Jashtëm i Austrisë, Alexander Schallenberg, ka folur për çështjen e Asociacionit të komunave me shumicë serbe, ndërsa ka thënë se ka shembuj pozitiv, si rasti i Tirolit Jugor.

Schallenberg ka biseduar për këtë çështje me ministrin e Jashtëm të Serbisë, Ivica Daçiq, të mërkurën në Vjenë. Ai tha se Austria është shembull pozitiv.

“Austria ishte shteti pasardhës i Monarkisë së Danubit që “mbeti pas”. Sot është “një nga vendet më të pasura në botë, që është në paqe dhe ka marrëdhënie të mira me fqinjët e saj”. Schallenberg përmendi konkretisht shembullin e Tirolit të Jugut, të cilin Italia e kishte aneksuar pas Luftës së Parë Botërore, shkruan puls24.at, përcjell albinfo.at.

Kryediplomati austriak ka përshëndetur marrëveshjen e arritur në Ohër mes Kosovës dhe Serbisë për planin e zbatimit të Marrëveshjes bazë për normalizim të marrëdhënieve mes dy shteteve.

“Ka ende shumë takime dhe bisedime para nesh. Marrëveshja që u arrit është një sinjal i rëndësishëm. Mirëpres që Serbia dhe presidenti Aleksandar Vuçiq kanë pranuar marrëveshjen. Nuk ishte hap i lehtë, por është i rëndësishëm”, ka thënë Schallenberg.

Ai ka thënë se normalizimi i marrëdhënieve mes Kosovës dhe Serbisë është i rëndësishëm për rajonin.

“Normalizimi i marrëdhënieve nuk ka alternativë. Ka mbështetjen e BE-së dhe SHBA-së. Dhe nuk ka alternativë. Siç tha një ministër britanik ‘ëshë shfaqja e vetme në qytet’”, tha Schallenberg.

Ai tha po ashtu se të gjitha marrëveshjet duhet të zbatohen dhe atë sa më shpejt të jetë e mundur, përfshirë edhe Asociacionin.

Ministri i Jashtëm i Austrisë ka folur edhe për pushtimin rus të Ukrainës.

“Serbia, si vendi më i madh në Ballkanin Perëndimor, ka një përgjegjësi të veçantë. Mirëpres që Serbia dënoi agresionin në OKB dhe shpresojmë, dhe këtu jam jehonë e BE-së, se ‘Serbia do t’u bashkohet sanksioneve’. Kushto që dëshiron të jetë anëtar i BE-së, nuk mund të qëndrojnë mënjanë”, ka thënë Schallenberg, transmeton albinfo.at.

Ndërkohë ministri i Jashtëm i Serbisë, Daçiq, ka thënë se deri në “formim të Asociacionit nuk mund të bisedohet për hapa të tjerë të zbatimit”.

“Vuçiq e tha qartë se ne pajtohemi t’i zbatojmë parimet deri në vijat tona të kuqe që i kemi theksuar”, ka thënë Daçiq. “Ky tash është edhe një test për komunitetin ndërkombëtar”.

---