Zvicër: Konsumi i energjisë elektrike në vitin 2022 erdhi 80% nga energjitë e rinovueshme

(KEYSTONE/Christian Beutler)

Gati 80% e energjisë elektrike të konsumuar në Zvicër në vitin 2022 vinte nga energjitë e rinovueshme, teksa hidrocentralet e mëdha zënë pjesën më të madhe me 65%, shkruan RTS, përcjell albinfo.ch.
Energjia bërthamore zë vendin e dytë me 20% dhe më pas vijnë energjitë e rinovueshme “të reja”, përkatësisht fotovoltaikët, energjia e erës, hidrocentralet e vogla dhe biomasa, të cilat gjithsej janë 14%, një rritje prej 2 pikë e përqindjes krahasuar me vitin 2021, ka treguar Zyra Federale e energjisë në një deklaratë për shtyp.

Energjia elektrike nga lëndët djegëse fosile përfaqësonte rreth 2%.

68% e energjisë elektrike nga hidrocentralet që nuk përfitojnë nga sistemi i shpërblimit është prodhuar në Zvicër, një përqindje më e ulët në krahasim me vitin 2021 (76%). 2022-a ka qenë një vit shumë i thatë, i cili shkaktoi prodhim të ulët të energjisë elektrike vendase nga energjia hidraulike.

Ndryshe, rreth 68% e energjisë elektrike nga energjitë e reja të rinovueshme prodhohej në Zvicër dhe 45% përfituan nga inkurajimi përmes sistemit të shpërblimit të injektimit. Sa i përket energjisë me origjinë bërthamore, ajo erdhi, si një vit më parë, pothuajse ekskluzivisht nga Zvicra.