Kryetari i PDK-së fton partnerët ndërkombëtarë ta dënojnë qartë sulmin ndaj shtetit të Kosovës

Kryetari i Partisë Demokratike të Kosovës, Memli Krasniqi, ka reaguar pas sulmit të sotëm në veri të Kosovës, duke thënë se sulmi i së dielës në fshatin Banjskë në veri është sulm direkt ndaj shtetit të Kosovës.

Përmes një postimi në rrjetin social “Facebook”, Krasniqi i ka ftuar partnerët ndërkombëtarë ta dënojnë sulmin dhe t’i kërkojnë Serbisë ndalimin e ndërhyrjeve në territorin e Kosovës, shkruan albinfo.ch.

“Kërkoj nga organet përgjegjëse që hetimet e plota të bëhen sa më shpejt dhe përgjegjësit të sillen para drejtësisë për të marrë dënimet meritore. Në të njëjtën kohë, apeloj tek të gjithë qytetarët për vigjilencë e vetëpërmbajtje, sepse përshkallëzimi i situatës në veriun e vendit tonë i konvenon vetëm Serbisë dhe bandave kriminale nën kontrollin e saj. Po ashtu, ftoj partnerët ndërkombëtarë të Kosovës që të dënojnë qartë sulmin dhe t’i kërkojnë Serbisë urgjentisht ndalimin e ndërhyrjeve në territorin e Kosovës dhe provokimit të mëtejmë të situatës”, ka shkruar Krasniqi.