Kurti në Londër, i kundërvihet Brnabiqit: Vendi im quhet Republika e Kosovës, jo “Kosova e Metohija”

Kryeministri i Kosovës, Albin Kurti, në Samitin e Investimeve në Ballkanin Perëndimor, në Londër pas fjalës së kryeministres serbe, Ana Brnabiq, ka reaguar duke thënë se Kosova është Republikë dhe jo Kosova e Metohija, transmeton albinfo.ch.

“Vendi im quhet Republika e Kosovës, jo si po i referohet këtu ‘Kosova e Metohija’. Po të ndiqja këtë rrugë, do të merrja shumë kohë për të folur, pasi pos Serbia, do të duhej të thosha Serbia e Vojvodina, e Sanxhaku, e Toplica, e Rashka dhe Lugina e Preshevës”, ka thënë ai.

Reagimi i Kurtit erdhi pas deklaratës së kryeministres serbe, e cila e quajti Kosovën provincë autonome të Serbisë.

“…kur them Serbia Qendrore, e kam fjalën Serbia, por një pjesë që nuk është e përfshirë në statistika është provinca jonë autonome Kosova e Metohija që ne e konsiderojmë që është pjesë e jona”, ka thënë ajo.