Talenti shqiptar në Gjermani që firmosi kontratë me Adidas

Kapiteni i Fortuna Düsseldorf U13 vazhdon të spikasë me paraqitjet e tij, ndërsa bashkëpunimi me Adidas konsiderohet një tjetër hap i rëndësishëm në zhvillimin e karrierës.

Futbollisti i ri shqiptar, Premtim Haxhimusa, po vazhdon të tërheqë vëmendjen në Gjermani me paraqitjet e tij premtuese në futbollin e moshave, transmeton albinfo.ch.

Kapiteni i ekipit U13 të Fortuna Düsseldorf ka hedhur një hap të rëndësishëm në karrierën e tij, duke nënshkruar kontratë bashkëpunimi me gjigantin e pajisjeve sportive, Adidas.

Ky bashkëpunim vlerësohet si dëshmi e potencialit dhe talentit që Premtimi ka shfaqur në vitet e fundit, duke u dalluar për cilësitë e tij në fushë, disiplinën dhe rolin udhëheqës si kapiten i ekipit.

I konsideruar si një nga talentët premtues me prejardhje shqiptare në Gjermani, Haxhimusa po ndërton gradualisht rrugën drejt një karriere të suksesshme në futboll, ndërsa nënshkrimi me Adidas përbën një tjetër arritje të rëndësishme në këtë rrugëtim./Albinfo.ch

---