Nis referendumi kundër zbehjes së pagës minimale në Zvicër

(KEYSTONE/Christian Beutler)

Sindikatat dhe partitë e majta në Zvicër kanë nisur zyrtarisht mbledhjen e nënshkrimeve për një referendum kundër një vendimi të Parlamentit federal, i cili sipas tyre rrezikon të dobësojë pagat minimale të vendosura nga kantonet dhe komunat.

Vendimi i Parlamentit parashikon që marrëveshjet kolektive të punës me zbatim të përgjithshëm të kenë përparësi ndaj pagave minimale të miratuara në nivel kantonal ose komunal.

Kundërshtarët e kësaj mase argumentojnë se ajo mund të ulë nivelin e mbrojtjes së punëtorëve në sektorët me paga të ulëta, si gastronomia, hoteleria dhe pastrimi, shkruan swissinfo.ch, transmeton albinfo.ch.

Komiteti i referendumit e cilëson këtë ndryshim si një sulm ndaj pagave dhe ndaj demokracisë direkte, duke theksuar se vendimet e marra nga votuesit në kantone dhe komuna do të anashkaloheshin. Sipas tyre, gati dy të tretat e personave që mund të preken nga kjo masë janë gra.

Edhe Këshilli Federal ka shprehur kundërshtimin e tij ndaj projektligjit, duke vlerësuar se ai bie ndesh me kompetencat kushtetuese të kantoneve për të vendosur paga minimale.

Për të çuar çështjen në votim popullor, iniciatorët duhet të mbledhin 50 mijë nënshkrime të vlefshme brenda afatit ligjor. Nëse kjo arrihet, qytetarët zviceranë do të vendosin me referendum nëse ligji do të hyjë në fuqi apo do të refuzohet.