Kosovë: Dogana ka grumbulluar 18 për qind më shumë të hyra se një vit më herët

Dogana e Kosovës ka njoftuar sot se ka arritur rekord të ri. Sipas njoftimit, gjatë këtij viti Dogana ka mbledhur 500 milionë euro, apo 18 për qind më shumë – 78 milionë euro krahasuar me mbledhjen e të hyrave të vitit të kaluar. Grumbullimi i kësaj shume, sipas Doganës, e tejkalon edhe projeksionin prej 6 për qind për këtë vit fiskal, transmeton albinfo.ch.

“Këto të hyra janë mbledhur, edhe pse efekti në lirimet e taksave sipas vendimeve të Qeverisë për importin për prodhuesit dhe thellimi i lirimeve nga marrëveshjet e tregtisë së lirë janë thelluar dukshëm. Në këtë periudhë janë liruar 79 milionë euro taksa të kësaj kategorie apo 21 milionë më shumë se viti paraprak”, thuhet në njoftimin e Doganës.

Tutje në njoftim thuhet se ka pasur progres në lehtësimin e tregtisë, sidomos me funksionalizimin e zhdoganimit në portin e Durrësit dhe terminaleve shtetërore.

“Ky progres ka rezultuar në një kursim të konsiderueshëm të kostos prej 4.3 milionë euro gjatë periudhës tremujore, ndërsa që sipas trendit të progresit, ne parashikojmë që ky kursim të përshkallëzohet, duke arritur deri në 20 milionë euro deri në fund të vitit, duke optimizuar më tej proceset tona tregtare dhe duke përmirësuar rritjen ekonomike e njëkohësisht duke ndikuar në uljen e çmimit tek konsumatori”, thuhet në njoftim.