Fushatë kundër migrimit ilegal

Rruga e migrimit jo të rregullt është e rrezikshme për jetën tuaj, e kushtueshme, dhe pa përfitime, thuhet në fushatën e sponsoruar nga Ministra e Integrimit Evropian

Në kohën kur migrimi i kosovarëve drejte vendeve të BE-së ka marrë hov, duke ikë nga Kosova për çdo ditë nga 500 qytetarë, institucionet në Prishtinë kanë lansuar një fushatë sensibilizimi për të parandaluar migrimin. Duke besuar se kjo fushatë do të jetë produktive, iu thuhet qytetarëve “mos ikni sepse ktheheni edhe më të varfër”.

“Migrimi jo i rregullt nuk është zgjidhje për qytetarët e Kosovës. Rruga e migrimit jo të rregullt është e rrezikshme për jetën tuaj, e kushtueshme, dhe pa përfitime. Kosovarët nuk mund të marrin azil në vendet e BE-së! – Ju do të detyroheni të ktheheni në Kosovë”, thuhet në fushatën e lëshuar nga Ministra e Integrimit.

Po ashtu iu rekomandohet kosovarëve që mos të përjetojnë efektet shkatërruese të kampeve të azilkërkuesve. “Ardhmërinë e keni në shtetin tuaj, jo në vend të huaj”, thuhet në njoftimin e MEI.

Po ashtu qytetarëve iu është drejtuar edhe ministri i Integrimeve Evropiane, Bekim Çollaku. Ai ka thënë se migrimi i paligjshëm i bashkëqytetarëve që ka shënuar një rritje kohëve të fundit, është një e keqe e madhe e cila duhet ta ndalet.

“Migrimi i paligjshëm i bashkëqytetarëve që ka shënuar një rritje kohëve të fundit, është një e keqe e madhe të cilën ne duhet ta ndalim. Asnjëri nga ne të mos lejoj që kjo e keqe të shndërrohet në normalitet, sepse nuk është normale dhe nuk është zgjidhje”, thotë Çollaku.

Derisa institucionet e kanë përgjegjësinë përfundimtare, të gjithë sipas tij, mund të kontribuojmë që ta ndalim këtë veprim të dëmshëm dhe së bashku ta çojnë vendit drejt zhvillimit dhe përmirësimit të kushteve të jetesës.

“Premtimet e atyre që po e nxisin dhe po e lehtësojnë migrimin janë të rrejshme. I kemi bërë ballë problemeve shumë më të mëdha, duhet ta luftojmë edhe këtë. Andaj thuaj jo migrimit!”, deklaron ministri Çollaku.