Thirrja e deputetit gjerman: Pranojeni Kosovën në KiE, është moment historik

Çështja e anëtarësimit të Kosovës në Këshillin e Evropës, ishte ndër temat që u diskutuan në Bundestagun gjerman të enjten.

Shefja e diplomacisë gjermane, Annalena Baerbock, para deputetëve e bëri të qartë se Gjermania e mbështet fuqishëm Kosovën në këtë proces.

“Jam mirënjohëse për punën intensive të deputetëve gjerman. U bëj thirrje të gjithë të përfshirëve dhe Kosovës të bëjnë gjithçka që është në fuqinë e tyre për të arritur shumicën e nevojshme për anëtarësim sa më shpejt të jetë e mundur”, tha diplomatja gjermane.

Edhe më i zjarrtë për këtë çështje ishte deputeti gjerman nga radhët e CDU-s, Knut Abraham. Ai i bëri thirrje qeverisë gjermane që të marrë një vendim përfundimtar në favor të Kosovës.

Sipas Abraham edhe nëse Kosova nuk futet nesër në agjendë, Komiteti i Ministrave duhet të mblidhet sërish gjatë muajit qershor për ta shtyrë përpara këtë proces.

Është progres që Qeveria e Kosovës do të dorëzojë një statut për Asociacionin e Komunave me shumicë serbe në Gjykatën Kushtetuese deri në fund të muajit maj. Iniciativa e Kosovës duhet të vlerësohet sepse për ta bërë këtë gjë duhet të kesh vullnet dhe vizion politik. Tani situata mbetet e paqartë për ditën e nesërme, megjithatë edhe nëse Kosova nuk përfshihet në agjendë, atëherë në një të ardhme shumë të afërt duhet të mblidhet Komiteti i Ministrave sërish për ta shtyre përpara këtë proces. Më së largu në muajin qershor duhet të ketë një takim për anëtarësimin e Kosovës në Këshillin e Evropës”, ka thënë ai.

Tutje politikani gjerman konsideron se Kosova po trajtohet padrejtësisht për shkak se siç thotë ai Asociacioni nuk ishte asnjëherë kriter për tu anëtarësuar në Këshillin e Evropës.

“Për mendimin tim është e padrejtë që Kosovës në këtë fazë iu kërkua Asociacioni si kusht shtesë për tu anëtarësuar në Këshillin e Evropës. Asambleja Parlamentare e ka bërë shumë të qartë se Kosova i plotësuar të gjitha kushtet për tu anëtarësuar në këtë organizatë. Me të vërtetë është për të ardhur keq se si është duke u trajtuar Kosova. Tani kemi një moment historik para vetes për ta mbështetur Kosovën dhe ne duhet ta bëjmë këtë gjë”, tha ai për Tëvë 1, përcjell Albinfo.ch.

Gjatë ditës, Ambasada e Gjermanisë në Prishtinë i tha televizionit se Kosova do duhej ta dërgonte draft-statutin për themelimin e Asociacionit të komunave me shumicë serbe në Gjykatën Kushtetuese para takimit të Komitetit të Ministrave të Këshillit të Evropës./Albinfo.ch/