Arrin në 84 numri i të vdekurve si pasojë e përmbytjeve në Afganistan

Foto nga arkiva @unsplash

Ka arritur në 84 numri i personave të vdekur si pasojë e përmbytjeve në Afganistan. Një zëdhënës i talebanëve sot ka deklaruar se qindra persona janë zhdukur, transmeton albinfo.ch.

Shirat e dendur dhe përmbytjet kanë goditur katër rrethe në provincën Faryab mbrëmjen e së shtunës, duke lënë 66 persona të vdekur, pesë të plagosur dhe tetë të zhdukur.

“18 persona të tjerë kanë vdekur nga përmbytjet të premten”, tha Esmatullah Moradi, zëdhënës i guvernatorit të provincës në Faryab.

Sipas tij, rreth 1 mijë e 500 shtëpi u shkatërruan plotësisht ose pjesërisht, ndërsa qindra hektarë toka bujqësore u shpërndanë dhe më shumë se 300 kafshë ngordhën, shkruan AP.

Në anën tjetër, në provincën perëndimore të goditur rëndë, Ghor, 50 njerëz u raportuan të vdekur nga përmbytjet e së premtes, sipas Abdul Wahid Hamas, zëdhënës i guvernatorit të provincës.