Zvicra i jep Ukrainës afro 60 milionë CHF për digjitalizim të administratës publike

Ilustrim, Pixabay

Qeveria zvicerane ka rënë dakord t’i japë Ukrainës së shkatërruar nga lufta 58.7 milionë CHF për digjitalizimin e administratës së saj publike. Paratë do të kanalizohen në projekte në zonat e prekura drejtpërdrejt nga lufta gjatë katër vjetëve të ardhshme, tha qeveria të premten.

Paratë do të përdoren për projekte në shëndetësi, arsim dhe çminim humanitar. Këshilli Federal po ridrejton fondet nga buxheti i rregullt i bashkëpunimit ndërkombëtar të Zvicrës, transmeton albinfo.ch.

Qeveria e justifikoi këtë duke deklaruar se Zvicra po përdor grantin për të promovuar reformat demokratike në Ukrainë përmes digjitalizimit dhe në të njëjtën kohë, për të rritur transparencën e shërbimeve shtetërore. Të dyja zonat janë të një rëndësie qendrore për rindërtimin e vendit, i cili është nën sulm nga Rusia që nga shkurti i vitit 2022, raporton swissinfo.

Ukraina kohët e fundit ka ecur përpara me digjitalizimin falë mbështetjes nga Zvicra dhe partnerë të tjerë ndërkombëtarë. Për shembull, mbi 20 milionë ukrainas përdorin tani aplikacionin Diia për të paguar taksat ose për të rinovuar dokumentet e tyre të udhëtimit.

Zvicra synon të shpallë mbështetjen e saj ndaj digjitalizimit dhe e-qeverisjes në konferencën e ardhshme të rindërtimit për Ukrainën. Kjo do të zhvillohet në datat 11-12 qershor në Berlin të Gjermanisë. Konferencat e mëparshme janë mbajtur në Lugano, Zvicër, në 2022 dhe Londër, më 2023.