Gjilani shënon “Ditët e Mërgatës”, me ekspozita dhe takime të artistëve nga diaspora

Aktivitetet kanë filluar në Galerinë e Arteve të qytetit, me ekspozitën “Ekzistenca” dhe vazhdojnë me takimin e krijuesve nga diaspora, në Vali Ranch

Ditë më parë, gjegjësisht më 25 korrik kanë nisur në Gjilan aktivitetet “Ditët e Mërgatës 2024”, organizuar nga Drejtoria për Kulturë, Rini dhe Sport e Komunës së Gjilanit.

Aktivitetet kanë filluar në Galerinë e Arteve të qytetit të Gjilanit me ekspozitën e arteve pamore “Ekzistenca”, edicioni ll, ku me punimet e tyre janë prezantuar artistët nga mërgata dhe nga trojet shqiptare, shkruan 2lonline.com.

Nënkryetarja e Komunës së Gjilanit, Leonora Morina-Bunjaku, ka bërë hapjen e aktivitetit “Ditët e Mërgatës”, gjegjësisht ekspozitën kolektive të arteve pamore.

Me këtë rast ajo ka thënë se artistët nëpërmjet artit po sjellin e po paraqesin nga një pjesë të traditës dhe të kulturës sonë. Ajo ka falënderuar bashkatdhetarët për kontributin e dhënë në kohë të ndryshme për vendlindjen.

“Duke kontribuar në vendlindje, do t’i motivoni edhe gjeneratat e reja që të vazhdojmë urat lidhëse me vendlindjen e të parëve të tyre”, ka thënë tutje Morina-Bunjaku.

Magbule Xhemaili, kuratore e ekspozitës, në fjalën e saj, veç tjerash, ështe shprehur se “po e përmbyllin një angazhim të përbashkët për këtë ekspozitë me 19 artistë nga diaspora e trojet shqiptare. Qëllimi i kësaj ekspozite është themelimi i një ure lidhëse bashkëpunimi mes artistëve nga të gjitha hapësirat kombëtare”, ka thënë ajo, mes tjerash.

Sipas drejtorit pë Kulturë, Rini e Sport, Kushtrim Zeqiri, qëllimi i kësaj ekspozite është që veprat e bashkatdhetarëve t’i shijojmë edhe në Kosovë. Ai ka shtuar se kjo ekspozitë është futur në programin e galerisë që do të organizohet çdo vit.

Artisti nga komuna e Gjilanit, Zeqirja Rexhepi, i cili prej vitesh jeton dhe krijon në Kanada, në fjalën e tij ka thënë se ky aktivitet është shumë i rëndësishëm për krijuesit jashtë vendlindjes. Ai është shprehur se ndihet i emocionuar që pas 25 vjetësh përsëri është pjesëmarrës në ekspozitën në vendlindje.

Disa ditë pas këtij aktiviteti, pikërisht sot, më 30 korrik, në Vali Ranch të Gjilanit, me organizim të platformës mediale albinfo.ch do të ketë edhe një aktivitet kulturor e argëtues kushtuar mërgatës. Në kuadër të tij bën pjesë edhe një takim i krijuesve të arteve pamore nga diaspora, me prejardhje nga reegjioni i Anamoravës dhe më gjerë. Në këtë takim do të ekspozohen edhe vepra arti.

 

---