Ndahen 4 milionë euro për “Trepçën”

Qeveria e Kosovës ka ndarë 4 milionë e 14 mijë euro për mbështetje të “Trepçës”.

Paratë janë marrë nga kategoria e subvencioneve dhe transfereve nga pakoja e ringjalljes ekonomike.

Kryeministri i Kosovës, Albin Kurti,  ka njoftuar në hapje të mbledhjes për subvencionimet që dë të bëhen në shëndetësi, arsim dhe për “Trepçën”.

“4 milionë euro dedikuar mbështetje për Trepçën në mënyrë që të tejkalohet kriza aktuale, ku ndërmarrja nuk ka arritur t’i sigurojë pagat nga xehja e nxjerrë. Duket se ka tepër shumë punëtorë mbi tokë, për xehet e pakta të nxjerra nga nëntoka”, ka thënë ai.

Për arsim janë ndarë 6.5 milionë euro për t’i plotësuar mungesat për subvecionimin e prindërve për blerje të teksteve shkollore. E në shëndetësi janë ndarë 1.77 milionë euro për funksionalizimin e Poliklinikës në Podujevë.

 

---