Kurti: Vizita e Burns dëshmon bashkëpunimin e ngushtë ndërmjet institucioneve tona dhe Komunitetit të Inteligjencës

Kryeministri Albin Kurti ka njoftuar edhe në profilin e tij në platformën “X’ për takimin që zhvilloi dje me Shefin e CIA-s, William Burns, që e cilësoi si takim të rëndësishëm strategjik.

Kurti ka deklaruar se vizita e Burns në Kosovë dëshmon bashkëpunimin gjithnjë e më të ngushtë ndërmjet institucioneve të inteligjencës dhe sigurisë së Kosovës dhe Komunitetit të Inteligjencës, raporton Express.

Në këtë takim, Kurti ka thënë se ka rikonfirmuar përkushtimin për promovimin e paqes dhe sigurisë në Ballkanin Perëndimor.

“Falënderova drejtorin Burns për mbështetjen e vazhdueshme për Kosovën dhe rikonfirmova përkushtimin tonë për të promovuar paqen dhe sigurinë në Ballkanin Perëndimor. Këto synime të përbashkëta janë të mundshme vetëm nëpërmjet një angazhimi të vërtetë për sundimin e ligjit, demokracinë dhe të drejtat e njeriut, nga ana e të gjitha vendeve në rajon”, ka shkruar Kurti.