Hapet shkolla e dytë shqipe në Belgjikë

Shkolla e dytë për mësimin e gjuhës shqipe është hapur në qytetin më të vjetër belg, në Tongeren.

Për kurorëzimin e këtij projekti më se një vit përfaqësuesit e shoqatës “Iliria” ishin angazhuar në bashkëpunim me organizatën federale dhe komunën e qytetit të vetëm romak për provincën lindore të Limburgut.

Myrvete Fekaj, mësuese e gjuhës shqipe, thotë se kishin filluar çdo gjë nga zero mbi baza vullnetare.
„Ka jashtëzakonisht një interesim të madh të prindërve për të sjellë fëmijët që të mësojnë gjuhën shqipe dhe shpresoj se do të na ecë mbarë”.

25 nxënësit e regjistruar tashmë do të mësojnë bukurshkrim falë abetareve të dhuruara nga ambasada e Kosovës, ndërsa Tirana vjen në ndihmë me 3 nivelet e botimeve të reja specifike për fëmijët e emigrantëve: “Të mësojmë gjuhën amtare dhe kulturën shqiptare”.

Siç raporton Top-Channel, në ceremoninë e hapjes ishin të pranishëm nënkryetarët e Komunës së Tongeren për arsimin, çështjet ekonomike dhe shoqërore, ambasadorët e Shqipërisë dhe Kosovës në Belgjikë, deputeti shqiptar i Brukselit, përfaqësues të shoqatave shqiptare nga qytetet e tjera. Drejtuesit e shkollës së parë shqipe të Brukselit shprehën gatishmëri për të ndarë përvojën e tyre 10-vjeçare.

Mësimi plotësues i gjuhës dhe kulturës shqiptare është vetëm 4 orë në javë.