Kosova pranohet edhe në Kick-Boks

Lajmin për pranimin e Kosovës në Federatën Evropiane të Kick-Boksit e ka konfirmuar, kryetari i Federatës së Kick-Boksti të Kosovës, Fatmir Makolli

Pas anëtarësimit të Kosovës në FIBA edhe Federata e Kick-Boksit të Kosovës është pranuar në Federatën Evropiane të Kick-Boksit. Ky anëtarësim ka ndodhur në mbledhjen e Bordit Ekzekutiv të Kick-Boksit që u mbajt në Stamboll të Turqisë. Me këtë pranim sporti kosovarë shënon edhe sukses në internacionalizim.

Lajmin për pranimin e Kosovës në Federatën Evropiane të Kick-Boksit e ka konfirmuar për “Zërin”, kryetari i Federatës së Kick-Boksti të Kosovës, Fatmir Makolli. “Jemi pranuar në Federatën Evropiane me shumicë votash, kishte vetëm një abstenim”, deklaroi Makolli.

Sipas tij, Federata Evropiane e Kick-Boksit e ka rekomanduar Federatën Ndërkombëtare të Kick-Boksit që ta pranojë Republikën e Kosovës. Dhe sipas Makollit, Bordi Ekzekutiv i kësaj të fundit do ta njoh Kosovën në mbledhjen e Bordit Ekzekutiv që mbahet më 18 mars në Turqi.

Ndryshe, vetëm dy ditë më parë, Kosova u pranua edhe nga Federata Ndërkombëtare e Basketbollit (FIBA). Ndërsa pas pranimit në shumë federata dhe mbi të gjitha në Komitetin Olimpik Ndërkombëtarë, Kosova ka mbetur pa u pranuar vetëm nga UEFA dhe FIFA. Në Prishtinë janë optimist se edhe ndërkombëtarizmi i futbollit do të ndodhë shumë shpejt.