Rrahmani: Ka pasur fyerje të vazhdueshme ndaj Kosovës

“UEFA duhet të vendosë sepse jemi futbollistë, jemi për të përfaqësuar këtu popullin tonë, shtetin tonë që ka të kaluar të rëndë”, deklaroi Rrahmani

Kapiteni i Kosovës, Amir Rrahmani, ka folur në konferencë për media, pas ndeshjes ndaj Rumanisë, që u ndërpre në minutën e 93-të.

“Ka pasur thirrje të vazhdueshme “Serbia”. Kjo ndodhi për 90 minuta. Në minutat shtesë, nisën thirrjet me fjalë të tjera që s’dua t’i përsëris sepse është turp. I thash për herë të parë gjyqtarit që t’i dëgjojë. Ai s’bëri asgjë. Herën e dytë s’deshi të dëgjojë. Pas herës së tretë i thash që do të dalim sepse kjo është shumë e gabuar”, ka thënë Rrahmani, duke shtuar:

“Ata kanë qenë në dijeni sepse Federata jonë ua ka bërë të qartë që të provojnë të shmangin këtë. Fansat nisën edhe më shumë pas kësaj me thirrjet “Kosova, Serbia”.

Prandaj vendosëm të mos dalim më siç ndodhi vitin e shkuar”.

Tashmë UEFA, do të vendosë fatin e kësaj ndeshje. “UEFA duhet të vendosë sepse jemi futbollistë, jemi për të përfaqësuar këtu popullin tonë, shtetin tonë që ka të kaluar të rëndë. Një luftë e madhe ka marrë jetën e njerëzve, ka pasur masakra. Kjo është e tepërt. Ndaluni. Të gjithë duhet ta dinë se Kosova është Kosovë ose Kosova është Shqipëri. Kaq. Këtu mbaron”, përfundoi Amir Rrahmani.

 

---