IKSHPK: Uji nga kanali i Ibër-Lepencit, i pijshëm

Instituti Kombëtar i Shëndetësisë Publike të Kosovës ka njoftuar sot se uji nga kanali i Ibër-Lepencit tani mund të përdoret edhe për pije.

Përmes një postimi në rrjetin social “Facebook”, instituti ka bërë të ditur se i ka bërë analiza laboratorike ujit në impiantet e trajtimit të tij në Shipol, Balincë, Drenas dhe Shkabaj, në katër ditët e fundit.

“IKSHPK gjatë këtyre ditëve nga të gjitha impiantet e lartëcekura ka marrë gjithsej 100 mostra të ujit për analiza fiziko-kimike, 100 për analiza bakteriologjike si dhe 13 mostra për analiza në metale të rënda (në ujin e pa trajtuar dhe ujin nga rrjeti shpërndarës). Rezultatet laboratorike nga dy laboratoret , IKSHPK dhe QRSHP-Mitrovicë, për  katër ditët e fundit (e premte, e shtunë, e diele dhe e hënë, 06-09 dhjetor-2024) rezultojnë brenda standardeve të parapara për ujin e pijes për të gjithë parametrat e kërkuar sipas UA 10/2021 ”Cilësia e Ujit të destinuar për konsum nga njeriu”. Prandaj bazuar në këto rezultate:  Uji që nga sot (09.12.2024) mund të përdoret për pije. IKSHPK i rekomandon KRU “Mitrovica”  dhe KRU “Prishtina” që të vazhdojë mbikëqyrjen dhe trajtimin e ujit dhe të sigurojë ujë në sasi dhe cilësi, sipas standardeve për ujin e pijes bazuar në UA 10/2021 ‘Cilësia e Ujit të destinuar për konsum nga njeriu’.”, thuhet në njoftim, transmeton albinfo.ch.