Austria mbështet hyrjen e Bullgarisë dhe Rumanisë në Shengen pas disa vitesh vonesë

Austria ka njoftuar se nuk do të vërë veton ndaj hyrjes së plotë të Bullgarisë dhe Rumanisë në zonën Shengen, duke i lejuar ata të bashkohen me zonën pa kufij që në fillim të vitit të ardhshëm. Masa vjen pas një marrëveshjeje për mbrojtjen e kufijve me të dy vendet.

Austria nuk do të vërë veton ndaj hyrjes së plotë të Bullgarisë dhe Rumanisë në zonën e gjerë Shengen pa kufij të Evropës, tha qeveria të hënën, duke hapur rrugën për dy vendet e Evropës Lindore për t’u bashkuar plotësisht me zonën e lëvizjes së lirë.

Bullgaria dhe Rumania, të dyja anëtare të BE që nga viti 2007, u integruan pjesërisht në zonën Shengen këtë vit, duke hapur udhëtimin ajror dhe detar pa kontrolle kufitare.

Drita jeshile nga Vjena — e cila pengoi hyrjen e tyre të plotë për shqetësimet e migracionit — do të nënkuptonte se lëvizja e lirë mund të shtrihej në rrugët e tyre tokësore që në vitin e ardhshëm.

Një zëdhënës i ministrisë së brendshme i tha AFP se “ne nuk do të përdorim veton tonë” në një takim të ministrave të drejtësisë dhe punëve të brendshme të BE të enjten, i cili pritet të vendosë për këtë çështje.

Bashkimi me zonën pa kufij kërkon miratimin e të 27 vendeve anëtare të BE-së.

Bukureshti dhe Sofja përmbushën të gjitha kriteret teknike të përcaktuara nga Brukseli në 2010, por kaluan më shumë se një dekadë duke pritur për t’u bashkuar me zonën Shengen pasi shtete të ndryshme anëtare bllokuan hyrjen e dy vendeve.

Që nga viti 2022, aplikimet e tyre janë pezulluar nga Austria, e cila për vite ishte ankuar për pritjen e një numri joproporcional të emigrantëve pa dokumente si rezultat i kufijve të jashtëm të Shengenit të mbrojtur keq.

Muajin e kaluar, Austria tha se ishte e hapur për hyrjen e plotë të Bullgarisë dhe Rumanisë pasi të tre vendet nënshkruan një marrëveshje “paketë për mbrojtjen e kufirit” në Budapest.

Sipas ministrit të Brendshëm austriak Gerhard Karner, marrëveshja parashikon vendosjen e përbashkët të rojeve kufitare në kufirin bullgaro-turk dhe kontrolle të përkohshme kufitare në rrugët tokësore për një periudhë fillestare prej gjashtë muajsh.

E krijuar në vitin 1985, zona Shengen aktualisht përfshin 29 anëtarë — 25 nga 27 shtetet anëtare të Bashkimit Evropian si dhe Zvicrën, Norvegjinë, Islandën dhe Lihtenshtajnin.

Është zona më e madhe në botë pa kontrolle të kufijve të brendshëm, ku më shumë se 400 milionë njerëz mund të udhëtojnë lirshëm brenda zonës.

 

 

 

 

---