Graci austriak si model për shkollat e Prishtinës

delegacioni ka vizituar shkollën publike “Graz International Bilingual School” (GIBS) ku me udhëheqësit e shkollës u diskutua lidhur me vështirësitë dhe përparësitë e aplikimit të projektit të digjitalizimit

Informimi rreth digjitalizimit të shkollave ka qenë shkaku i vizitës që Drejtoresha e Drejtorisë Komunale të Arsimit, Arbërie Nagavci dhe udhëheqësja e kabinetit të kryetarit, Fitore Pacolli, e kanë bërë në Grac të Austrisë. Po ashtu ato janë njohur edhe me përvojën të cilën e ka Austria me digjitalizimin e administratës së shkollave.

Siç bëjhet e ditur nga një njoftim i Komunës së Prishtinës, me këtë rast, delegacioni ka vizituar shkollën publike “Graz International Bilingual School” (GIBS) ku me udhëheqësit e shkollës u diskutua lidhur me vështirësitë dhe përparësitë e aplikimit të projektit të digjitalizimit, bëhet me dije nga një njoftim i Komunës së Prishtinës.

“Gjatë kësaj vizite, Nagavci dhe Pacolli u pritën në takim edhe nga drejtori i Drejtorisë së Arsimit në qytetin e Gracit, Hohensinner me të cilin, përpos procesit të digjitalizimit, diskutuan edhe lidhur me qëndrimin tërë ditor në shkolla, funksionimin e çerdheve publike dhe atyre private, si dhe për ligat sportive në shkolla dhe bashkëpunimin e tyre me shoqatat e sportit”, thuhet në njoftim.
Sipas njoftimit, Drejtoria Komunale e Arsimit të Komunës së Prishtinës ka për synim digjitalizimin e administratës nëpër shkollat e kryeqytetit me qëllim të përmirësimit të procesit edukativo – arsimor.

Kohë më parë Gracin me ftesë të kryetarit të këtij qyteti Siegfried Nagl e vizitoi edhe kryetari i Komunës së Prishtinës, Shpend Ahmeti. Në këtë takim kryesisht u diskutua për planifikimin urban dhe platformën “Smart city” (Qyteti i mençur), infrastrukturën dhe çështjet e arsimit.