Eurodeputeti austriak: Kosovës t’i hiqen masat ndëshkuese

Photo Credits: M.Lahousse

Së fundmi, deputeti i Parlamentin Evropian, Lukas Mandl, thotë se Bashkimi Evropian duhet t’i heqë masat ndëshkuese ndaj Kosovës. Ai ndër të tjera pret që me Komisionin e ri evropian do të ketë zhvillime pozitive në kuadër të dialogut mes Kosovës dhe Serbisë, përcjell albinfo.at.

Nuk ka shenja se Bashkimi Evropian do t’i heqë masat ndëshkuese ndaj Kosovës për arsye se shtetet anëtare të bllokut nuk kanë konsensus të qartë për këtë çështje.

BE-ja i vuri këto masa ndaj Kosovës në qershor të vitit 2023 meqë vlerësoi që kryeministri i vendit, Albin Kurti, nxiti tensione në pjesën veriore të vendit.

Por, si të padrejta këto masa po i vlerëson eurodeputeti në Parlamentin Evropian, Lukas Mandl, i cili po kërkon që këto masa ndëshkuese ndaj Kosovës të hiqen menjëherë.

“Që nga fillimi unë kam qenë kundër masave ndëshkuese ndaj Kosovës sepse konsideroj se janë të paarsyeshme. Qytetarët e Kosovës kanë vuajtur kaq shumë përgjatë historisë andaj nuk i meritojnë këto masa gjatë kësaj periudhë të vështirë. Këtu shoh përpjekje shumë të mëdha për të ecur përpara drejt rrugës evropiane andaj këto masa ndëshkuese duhet të hiqen menjëherë”, tha eurodeputeti për Tëvë1.

Mandl pret ndryshime serioze me Komisionin e ri Evropian.

Diplomati austriak thotë se shefja e politikës së jashtme të BE-së, Kaja Kalas, do ta ketë në fokus çështjen e dialogut mes Kosovës dhe Serbisë si dhe në tërësi rajonin e Ballkanit Perëndimor.

“Unë kam shumë besim në Komisionin e ri Evropian dhe pres nga Përfaqësuesja e Bashkimit Evropian për Politikë të Jashtme dhe Siguri, Kaja Kalas, të ketë një qasje më ndryshe për vendet e Ballkanit Perëndimor dhe për dialogun mes Kosovës dhe Serbisë. Mendoj se ajo është e interesuar që çështja e dialogut të marrë një epilog. Gjithashtu mendoj se ndërmjetësi i ri i dialogut, Peter Sorensen, do të bëj punë më të mirë krahasuar me paraardhësit e tij. Megjithatë duhet përpjekje serioze nga Kosova dhe Serbia për të shënuar progres në dialog”, deklaroi ai.

Eurodeputeti austriak po qëndron për vizitë në Kosovë, ai gjatë së premtes mbajti një diskutim para studentëve të Universitetit të Prishtinës.