Qeveria Federale e Zvicrës kundër rikthimit të vinjetës për biçikletat

(KEYSTONE/Alexandra Wey)

Qeveria Federale e Zvicrës ka refuzuar propozimin për të rikthyer vinjetën për biçikletat. Kjo është bërë e ditur në përgjigje të një iniciative të paraqitur nga Nina Fehr Düsel, anëtare e SVP nga kantoni i Cyrihut.

Düsel kërkoi që Qeveria të shqyrtojë mundësinë e rivendosjes së një vinjete për biçikletat, me qëllim që të mbulohet pjesërisht financimi i infrastrukturës rrugore për korsitë e biçikletave. Iniciativa u mbështet nga 39 deputetë të tjerë nga partitë SVP, FDP dhe Qendra, transmeton albinfo.ch.

Sipas Düsel, vendosja e një pagese simbolike prej 20 frangash në vit për çdo person mbi moshën 12 vjeç dhe jo për çdo biçikletë do të siguronte rreth 90 milionë franga në vit për shtetin.

Megjithatë, Qeveria Federale e konsideron të papërshtatshëm nisjen e një procesi ligjor pa kryer më parë një analizë të plotë. Ndër shqetësimet e ngritura përfshihen mënyra e mbledhjes së taksës, dizajni i saj dhe përdorimi i fondeve të mbledhura.