Studiuesit zviceranë zhvillojnë trajtim të ri kundër limfomës

Kezstone - ThisisEngineering RAEng

Sipas Institutit Paul Scherrer (PSI), kanceri mund të luftohet në mënyrë efektive me elementin radioaktiv terbium. Megjithatë, terapia ende nuk është testuar te njerëzit.

Në eksperimente laboratorike, përbërësi i ri aktiv me substancën terbium-161 shkatërroi qelizat kancerogjene nga dy deri në 43 herë më mirë se përbërësi me substancën lutetium-177, i cili tashmë përdoret në spitale.

Ky rezultat u publikua të hënën në revistën Journal of Nuclear Medicine. Minjtë me kancer, të trajtuar me terbium-161, mbijetuan mesatarisht dyfish më gjatë sesa ata që morën substancën ekzistuese, transmeton albinfo.ch.

“Rezultatet tona japin tregues të mirë se ky përbërës mund të jetë gjithashtu efektiv edhe kundër limfomës te njerëzit,” tha autorja kryesore Elisa Rioja-Blanco në një deklaratë për shtyp nga PSI.

I lidhur me antitrupa

Së bashku me studiues nga Spitali Universitar i Bernës (Inselspital), studiuesit e PSI kanë lidhur substancën radioaktive terbium-161 me një antitrup. Në të ardhmen, ajo mund të injektohet në gjakun e pacientëve të prekur.

Antitrupi lidhet me një strukturë në trup që gjendet shpesh në qelizat tumorale të limfomës: receptori i ashtuquajtur CD30. Në atë vend, ai shkatërron qelizat kancerogjene me rrezatimin e tij radioaktiv. Sipas PSI, qelizat tumorale formojnë receptorin CD30 në afro një të tretën e pacientëve me limfomë.

Parimi tashmë i njohur

Ky parim është i njohur dhe tashmë përdoret në spitale. Megjithatë, këto terapi të quajtura radionukleide aktualisht realizohen me izotopin lutetium-177.

Sipas PSI, ky përbërës përdoret për kancerin e prostatës dhe tumore që zhvillohen nga qelizat që prodhojnë hormone. Por terapia me lutetium-177 nuk është e përshtatshme për limfomën, pasi qelizat tumorale individuale dhe grupet më të vogla të tyre, që ndodhin në këtë lloj kanceri, nuk arrijnë të kapen nga elementi. Sipas studiuesve, terbium-161 lëshon “projektilë” më të saktë.

Tashmë, studimet klinike do të tregojnë nëse kjo terapi e re funksionon vërtet edhe te njerëzit.