Ushtria zvicerane rrit stërvitjet ndërkombëtare mes kritikave politike

(KEYSTONE/Peter Schneider)

Me vetëm 50 ditë në krye të Ministrisë së Mbrojtjes, Martin Pfister ka dhënë sinjalet e para të një kursi më të ashpër në çështjet e sigurisë: intensifikim i stërvitjeve ushtarake ndërkombëtare, rritje e bashkëpunimit me NATO-n dhe BE-n, dhe përgatitje për skenarë realë lufte që ai thotë po bëhen gjithnjë e më të mundshëm në Evropë. Por ky kurs nuk kalon pa kundërshtime, shkruan RTS, transmeton albinfo.ch.

Aktualisht, avionët luftarakë zviceranë F/A-18 po stërviten në Istrana të Italisë, krah për krah me Eurofighter, F-35 të ushtrisë italiane dhe F-16 të Forcave Ajrore Amerikane. Ushtrime të ngjashme janë zhvilluar muajin e kaluar në Hungari dhe për herë të parë në 30 vjet, në Austri, duke përfshirë 1.000 trupa.

SVP, partia më e madhe e djathtë në Zvicër, po ngre zërin kundër këtij angazhimi të zgjeruar jashtë kufijve kombëtarë. Për të, çdo afrim me NATO-n apo BE-n bie ndesh me neutralitetin e armatosur, një nga shtyllat e identitetit politik zviceran. Ajo kërkon që Pfister të distancohet qartësisht nga “aleancat ushtarake ndërkombëtare”.

Por sipas autoriteteve ushtarake, këto shqetësime janë të pabazuara. Peter Merz, komandant i Forcave Ajrore Zvicerane, theksoi në një intervistë se çdo stërvitje rishikohet ligjërisht dhe se asnjë skenar që shkel neutralitetin nuk praktikohet. Ai nënvizoi se stërvitjet jashtë vendit ofrojnë kushte që nuk janë të disponueshme në Zvicër dhe janë thelbësore për përgatitjen, transmeton albinfo.ch.

Pfister, nga ana e tij, mbron kursin e tij: “Është e rëndësishme të bashkëpunojmë me fqinjët tanë, NATO-n dhe BE-n, gjithmonë me respekt për neutralitetin,” deklaroi ai në paraqitjen e parë publike që nga marrja e detyrës. Për të, rreziku në rritje i një konflikti në Evropë kërkon një ushtri të përgatitur dhe të koordinuar.

Ndërkohë, kontestimet politike nuk ndalen me stërvitjet. Blerja e avionëve luftarakë F-35, të planifikuar të hyjnë në shërbim nga viti 2027, ka ngjallur polemika të mëdha, sidomos në krahun e majtë të Parlamentit. Por Merz është kategorik: anulimi nuk është opsion. Ai thekson se edhe vendet prodhuese të avionëve evropianë po blejnë F-35. Dymbëdhjetë shtete evropiane janë tashmë blerëse, transmeton albinfo.ch.