Milani sytë nga Granit Xhaka, oferta zyrtare pritet brenda 48 orëve

Keystone (AP Photo/Martin Meissner)

Granit Xhaka është bërë objektivi kryesor i Milanit për përforcimin e mesfushës në sezonin e ri. Pas një sezoni mbresëlënës me Bayer Leverkusen, ku ndihmoi skuadrën të fitonte titullin e Bundesligës dhe të shkëlqente në Europë, kapiteni i Zvicrës është në qendër të një merkatoje të nxehtë verore, transmeton albinfo.ch.

Sipas raportimeve nga “Gazzetta dello Sport” dhe “Blick”, drejtori sportiv i Milanit, Igli Tare, ka marrë një sinjal pozitiv nga vetë Xhaka për të ndërmarrë hapin e radhës. Klubi kuqezi po përgatit një ofertë konkrete, e cila pritet t’i dorëzohet Bayer Leverkusen brenda 48 orëve të ardhshme.

Por transferimi nuk është aspak i lehtë. Xhaka ka kontratë me Leverkusen deri në vitin 2028, dhe klubi gjerman nuk ka ndërmend ta lërë të largohet pa përfituar një shumë të konsiderueshme. Tarifa e transferimit për 32-vjeçarin llogaritet rreth 15 milionë euro, ndërsa pagat për tre vitet e ardhshme do të jenë një investim i rëndësishëm për Milanin.

Për më tepër, pas largimit të disa yjeve nga Leverkusen këtë verë, klubi gjerman kërkon të ruajë stabilitetin dhe liderët e skuadrës. Granit Xhaka shihet si figura qendrore në dhomën e zhveshjes dhe në fushë, ndaj Leverkusen do ta lejojë largimin e tij vetëm nëse realizon objektivat financiarë dhe sportive të merkatos, transmeton albinfo.ch.

Megjithatë, dëshira e Xhakës për një sfidë të re në Serie A, në një klub historik si Milani, mund të peshojë rëndë në bisedime. Për Milanin, shtimi i një profili me përvojë ndërkombëtare, lider në fushë dhe jashtë saj, është thelbësor për projektin e rikonstruktimit të mesfushës.

Xhaka, që u rendit i teti në klasifikimin e Serie A për performancën sezonale të futbollistëve që luajnë jashtë, shihet si një përforcim strategjik për të sjellë qetësi, disiplinë dhe lidership në mesin e fushës së Milanit, transmeton albinfo.ch.