Dështimi i transferimit të Mirlind Dakut nxit debat në Rusi, përmendet ndikimi serb dhe tatuazhi i UÇK-së

Mediat ruse po vazhdojnë të ndjekin me vëmendje arsyet që qëndrojnë pas dështimit të transferimit të sulmuesit kosovar, Mirlind Daku, nga Rubin Kazani te Zenit St Petersburg, duke përmendur faktorë politikë dhe tensione etnike si pengesë kryesore, transmeton albinfo.ch.

Trajneri i njohur rus, Rinat Bilyaletdinov, e ka lidhur refuzimin me praninë e lojtarëve serbë në skuadrën e Zenitit, duke përmendur konkretisht Strahinja Erakoviq dhe Vanja Drkushiq (i cili në fakt luan për Slloveninë). Ai ka aluduar se veprimet e Dakut gjatë Euro 2024, kur ai u përfol për gjeste dhe fyerje ndaj serbëve e maqedonasve, mund të kenë krijuar tension të brendshëm që e bëri të pamundur afrimin e tij.

“Ndoshta është një vendim i arsyeshëm që transferimi të shtyhet. Qëndrimi i kundërthënës nuk mund të mohohet dhe mund të ndikojë negativisht në atmosferën e ekipit”, ka deklaruar Bilyaletdinov për gazetën gazeta.ru, duke shtuar se transferimi mund të ishte një “bombë e kurdisur”.

Nga ana tjetër, portali “bombardir.ru” ka publikuar një tjetër arsye të mundshme: tatuazhi në shpinën e Dakut, i cili nderon komandantin e Ushtrisë Çlirimtare të Kosovës (UÇK), Agim Ramadani – Katana. Sipas raportimit të tyre, ky detaj ka shkaktuar shqetësime brenda bordit drejtues të Zenitit, të cilët kishin “dyshime të zgjatura” dhe në fund vendosën të mos finalizonin marrëveshjen, megjithëse kushtet financiare ishin arritur.

Asnjë nga pretendimet nuk është konfirmuar zyrtarisht nga klubi Zenit apo përfaqësuesit e lojtarit, por rastet kanë nxitur një debat më të gjerë për ndikimin e çështjeve politike dhe etnike në sportin profesionist.

Mirlind Daku mbetet aktualisht pjesë e Rubin Kazanit, ndërsa interesimi për të nga klube të tjera europiane nuk është shuar, megjithatë e ardhmja e tij mbetet e pasigurt, transmeton albinfo.ch.