Xherdan Shaqiri i palëkundur: “Asnjë shumë parash nuk më largon nga Baseli”

(KEYSTONE/Michael Buholzer)

Në një kohë kur transferimet ndërkombëtare të futbollistëve dhe trajnerëve shpesh diktohen nga interesat financiare, kapiteni i FC Basel, Xherdan Shaqiri, tregon një qëndrim të rrallë: ai zgjedh klubin dhe qytetin mbi gjithçka tjetër, shkruan Blick, transmeton albinfo.ch.

Në një deklaratë të bërë pas largimit të trajnerit Fabio Celestini drejt CSKA Moskës, Shaqiri u shpreh pa hezitim.

“Për momentin, asnjë sasi parash nuk mund të më largojë nga Baseli. Ndihem rehat këtu, siç e pamë sezonin e kaluar.”

Shaqiri, 33-vjeçar, është kthyer në një figurë qendrore për ekipin dhe tifozët, jo vetëm për shkak të performancës së tij në fushë, por edhe për përkushtimin ndaj klubit që e rriti si talent. Pas një karriere të bujshme në disa prej klubeve më të njohura evropiane, ai ka zgjedhur të qëndrojë në qytetin e tij të lindjes, duke i dhënë përparësi stabilitetit dhe përkatësisë ndaj komunitetit lokal, transmeton albinfo.ch.

Megjithëse nuk e kritikoi ish-trajnerin Celestini për vendimin për të shkuar në Rusi, Shaqiri theksoi se për të, zgjedhjet nuk bëhen vetëm mbi bazën e ofertave.

“Fabio zgjodhi me vetëdije këtë rrugë dhe duhet ta respektojmë. Por unë kam bindjet e mia. Unë jam këtu sepse dua të jem.”

Kapiteni i FC Basel ka qenë i rëndësishëm në rikthimin e klubit në garat evropiane dhe ka udhëhequr një skuadër të re me autoritet, përkushtim dhe përvojë ndërkombëtare. Prania e tij është kthyer në një simbol të stabilitetit dhe besnikërisë,  vlera që sot rrallë shihen në botën moderne të futbollit.

Shaqiri është i vendosur ta vazhdojë këtë kapitull me Baselin, duke bërë të qartë se karriera nuk matet vetëm me miliona, por edhe me vendet ku ndihesh në shtëpi, transmeton albinfo.ch.