Ambasadori Martin Berishaj intervistohet nga Prokuroria Speciale

fb - Martin B

Ambasadori i Kosovës në Kroaci, Martin Berishaj, është intervistuar të enjten nga Prokuroria Speciale e Republikës së Kosovës, në kuadër të hetimeve për disa vepra penale të dyshuara ndaj tij, përfshirë shpëlarjen e parave, shmangien nga tatimi dhe mosraportimin e pasurisë, shkruajnë mediat në Kosovë, transmeton albinfo.ch.

Kjo është hera e dytë që Berishaj intervistohet për të njëjtat dyshime. Më herët, ai ishte ftuar për të dhënë deklaratë edhe në muajin mars të këtij viti.

Sipas njoftimit zyrtar të Prokurorisë, hetimet ndaj ambasadorit janë në vazhdim dhe po trajtohen në kuadër të juridiksionit të Prokurorisë Speciale për vepra të natyrës së veçantë dhe me interes të lartë publik.

“Martin Berishaj është intervistuar të enjten nga Prokuroria Speciale, në kuadër të hetimeve që janë duke u zhvilluar ndaj tij lidhur me veprat penale ‘Shpëlarje e parave’, ‘Shmangie nga Tatimi’ dhe ‘Mos raportimi apo raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare’,” thuhet në njoftimin e Prokurorisë.

Ndërkohë, avokati i tij, Tomë Gashi, ka reaguar publikisht përmes një postimi në rrjetet sociale, duke thënë se Berishaj ka dhënë “deklaratë sqaruese” dhe se kjo deklaratë, sipas tij, ka ndihmuar në sqarimin e çështjes.

“Për t’i ndihmuar Prokurorisë Speciale të Kosovës, sot z. Martin Berishaj ka dhënë deklaratë sqaruese, me të cilën ne besojmë që i ka ndihmuar Prokurorisë për të eliminuar çdo dyshim për aferën e ndërtuar nga gazetari serb i afërm me shërbimin sekret të Serbisë, me qëllim të dëmtimit të reputacionit të profesorit Martin Berishaj,” ka shkruar Gashi në Facebook.

Çështja ndaj ambasadorit Berishaj kishte marrë vëmendje të madhe publike dhe mediatike pas raportimeve të mediave serbe në vitin 2022, që pretendonin për përfshirje të tij në aktivitete financiare të paligjshme, përfshirë transaksione të dyshimta në rajon. Vetë Berishaj i ka mohuar vazhdimisht këto pretendime, duke i cilësuar si të motivuara politikisht, transmeton albinfo.ch.