Valon Behrami rikthehet në Watdord, por me një rol të ri

Behrami, ka ndërtuar një karrierë të gjatë gati 20-vjeçare duke luajtur për klube si Lazio, West Ham United, Napoli, Hamburg dhe Udinese

Futbollisti shqiptar, Valon Behrami është rikthyer në Watford, por kësaj radhe me një rol të ri.

Ai është rikthyer në klubin anglez në një rol të ri si ndihmës i Drejtorit Sportiv, përcjell albinfo.ch.

Behrami, ka ndërtuar një karrierë të gjatë gati 20-vjeçare duke luajtur për klube si Lazio, West Ham United, Napoli, Hamburg dhe Udinese.

Ai është paraqitur 83 herë me kombëtaren e Zvicrës, duke u bërë lojtari i parë i Zvicrës që ka luajtur në katër Kampionate Botërore radhazi, nga viti 2006 deri në 2018.

“Kur isha lojtar i Watfordit, për herë të parë ndjeva se isha pjesë e një familje dhe kjo ndjenjë më ka munguar,” tha Behrami. “Jam shumë i lumtur që jam rikthyer. Scott Duxbury më kishte transferuar fillimisht te West Ham dhe më pas edhe te Watford si lojtar, prandaj nuk hezitova kur më kërkoi për herë të tretë të bëhem pjesë e diçka kaq emocionuese.”

Behrami shtoi se dëshiron të forcojë lidhjen mes stafit teknik, klubit, lojtarëve dhe tifozëve – si mënyra e vetme për të arritur qëllimet e përbashkëta.

“Jam këtu për ta mbështetur trajnerin Paulo Pezzolano dhe lojtarët. E di si ndihen lojtarët, çfarë u nevojitet dhe si reagojnë, veçanërisht kur gjërat nuk ecin siç duhet – gjë që ndodh shpesh në futboll. Paulo ka qenë i shkëlqyer që nga dita e parë; shihet qartë që ka dëshirë, disiplinë dhe standarde shumë të larta. Kjo është mënyra e vetme për të punuar”, theksoi Valon Behrami.

---