Milot Rashica pranë rikthimit në Bundesligë, i thotë “po” Monchengladbach

Sulmuesi i krahut i Beshiktashit, Milot Rashica, është një hap më afër rikthimit në futbollin elitar gjerman. Sipas asaj që raporton të premten mediumi turk “sonbirsoz”, reprezentuesi kosovar ka arritur marrëveshje personale me skuadrën e Borussia Monchengladbach, transmeton albinfo.ch.

Negociatat mes dy klubeve janë në zhvillim e sipër, por ende nuk është arritur një marrëveshje zyrtare. Beshiktashi është i gatshëm ta lirojë Rashicën nëse pranon një ofertë prej 9 deri në 10 milionë euro, shkruan mediumi turk.

29-vjeçari nga Vushtrria nuk është i panjohur për Bundesligën. Ai ka luajtur më parë për Werder Bremen nga viti 2018 deri më 2021, ku la gjurmë me paraqitjet e tij dinamike dhe aftësinë për të ndryshuar ritmin e lojës.

Rashica është pjesë e Beshiktashit që nga vera e vitit 2023, kur u transferua nga Norwich City për shumën prej 5 milionë eurosh. Ai ka kontratë me klubin turk deri në verën e vitit 2027. Para se të vishte fanellën e Beshiktashit, Rashica ka qenë pjesë edhe e Galatasarayt në Superligën turke, transmeton albinfo.ch.