Për të 47-ën herë dështon konstituimi i Kuvendit

Foto: Kuvendi i Kosoves

Për të 47-ën herë ka dështuar konstituimi i Kuvendit të Kosovës, përcjell albinfo.ch.

Kryesuesi i seancës, Avni Dehari, sërish hodhi në votim Komisionin për votim të fshehtë, i cili nuk po merr mbështetje nga partitë tjera, përveç Vetëvendosjes.

Të pranishëm në sallë ishin 105 deputetë, prej tyre 51 votuan për, asnjë kundër dhe asnjë abstenim.

Sipas aktgjykimit të Gjykatës Kushtetuese, deputetët janë të obliguar të konstituojnë legjislaturën e nëntë të Kuvendit deri më 26 korrik, më së largu.

Megjithatë, aktgjykimi nuk e qartëson se çfarë do të ndodhë nëse Kuvendi nuk konstituohet.

Ndërkohë, Vetëvendosje këmbëngul që emri i Albulena Haxhiut të hidhet në votim për kryeparlamentare përmes votimit të fshehtë, ndërsa partitë tjera e konsiderojnë këtë kundërkushtetuese, meqë në aktgjykim thuhet se zgjedhja e kryeparlamentarit duhet të bëhet sipas praktikave të deritanishme.

Presidentja Vjosa Osmani ka paralajmëruar se nëse nuk ndodh konstituimi, do t’i drejtohet sërish Gjykatës Kushtetuese