Këln: Endrit Smaili paraqet punim shkencor në Kongresin Ndërkombëtar të Papirologjisë

Nga Paris në Këln: Punimi i Endrit Smailit mbi cheirographa prezantohet në Kongresin Ndërkombëtar

Në kuadër të Kongresit Ndërkombëtar të Papirologjisë, i mbajtur më 28 korrik deri më 2 gusht në Këln, Gjermani, studiuesi Endrit Smaili prezantoi një pjesë të studimeve të tij postdiplomike, transmeton albinfo.ch.

Punimi i tij, me titull “Akti i shitjes në Antinoopolis (1): cheirographa-t”, trajton diplomatiken e kontratave greke të shitjes të prodhuara ndërmjet viteve 325 dhe 569 në qytetin e Antinoopolisit në Egjipt, i themeluar në vitin 130 si eponim i Antinoousit, të preferuarit të perandorit romak Hadrianit (117-138).

Smaili shpjegoi se këto akte, të njohura si cheirographa (dorëshkrime), përmbanin klauzola të bazuara në të drejtën kontraktuale romake dhe greke, duke imponuar dhe dëshmuar realizimin e transaksioneve. Një veçanti e tyre ishte se hartoheshin nga noterë privatë, ndryshe nga periudhat e mëhershme, kur përdorej vetëm notariati publik. Struktura dhe forma e akteve reflektonin reformat administrative të perandorit Dioklecian (284-305), si dhe standardizimet e perandorit Justinian (527-565).

Kjo kumtesë është pjesë e temës së diplomës së tij me titull “Shitblerja në Afrodité: editim, përkthim dhe komentim i akteve greke të shitjes në arkivat e Dioskorit të Afrodités dhe të Phoibammônit/Kollouthosit”, e realizuar në École Pratique des Hautes Études, Paris.

Smaili shprehu mirënjohje për profesorin Jean-Luc Fournet, i cili mbikëqyri punën e tij kërkimore, si dhe për pjesëmarrësit e kongresit, të cilët me pyetjet dhe komentet e tyre e ndihmuan të thellonte reflektimin mbi disa aspekte të studimit./Albinfo.ch

---